Европа прави нов чекор кон дигитална независност со лансирањето на новата социјална мрежа „W“, која се претставува како европска алтернатива на платформите како Фејсбук, Инстаграм и Икс (поранешен Твитер). Платформата е развиена во Шведска и има за цел да понуди поголема заштита на приватноста, транспарентност и контрола врз личните податоци на корисниците.
„W“ беше претставена на почетокот на годинава на Светскиот економски форум во Давос, а неодамна започна со бета-верзија достапна за корисниците. За разлика од многу постоечки социјални мрежи, платформата се фокусира на верификувани корисници и поголема доверба во содржините што се објавуваат.
Интересно е што Европската комисија веќе отвори профил на новата мрежа, а меѓу корисниците се и високи европски функционери, вклучувајќи ја претседателката на Европската комисија Урсула фон дер Лајен и претседателот на Европскиот совет Антонио Кошта.
Креаторите на платформата најавуваат дека сите податоци ќе бидат складирани на европски сервери и ќе бидат обработувани во согласност со европските правила за заштита на приватноста. Ова доаѓа во време кога сè погласни се повиците за намалување на зависноста од американските технолошки гиганти и за развој на сопствени европски дигитални решенија.
Иако експертите предупредуваат дека новите социјални мрежи тешко можат да се натпреваруваат со гиганти како Фејсбук, Инстаграм и Икс поради огромниот број корисници што тие веќе ги имаат, интересот за европски алтернативи постојано расте. Покрај „W“, во Европа веќе се развиваат и други проекти како Eurosky, Monnett и eYou, кои се обидуваат да понудат поотворен и побезбеден дигитален простор.
