Разговараше: Сара Танаскоска
Христина Христовска е дипломиран економист која ја следеше својата страст кон козметиката и денес е успешна жена-претприемач со сопствен салон за убавина. Нејзината приказна е инспиративна за сите кои сакаат да го следат својот сон – од лична нега и самопочит до создавање место каде клиентите се чувствуваат посебно и негувано.
Во овој разговор, Христина открива како започна нејзиниот пат во светот на убавината, што ја мотивира да го развива својот салон, кои се најбараните услуги и трендови, и што за неа значи најголемото задоволство од клиентите.
Читај БЕ: Како започна твојата приказна во светот на убавината?
Христина: Мојата приказна со салонот започна во 2020 година. Сепак, уште од мала секогаш имав желба да се грижам за себе и да бидам во добра форма, и тоа ме поттикна да го следам овој пат.
Читај БЕ: Што те мотивираше да отвориш сопствен салон за убавина?
Христина: Низ годините ги применував овие принципи на себе, и тоа ми ја зголеми желбата да им помогнам и на луѓето околу мене да се чувствуваат задоволно и негувано. Оттука, одлуката да отворам сопствен салон беше природен следен чекор во мојата приказна за убавината.
Читај БЕ: Што значи да се биде жена-претприемач во Македонија?
Христина: Да се сакаш себеси е најголемата мотивација за секоја личност да се изгради во успешна и остварена личност. Да се биде жена-претприемач во Македонија значи да имаш храброст да ги следиш своите соништа, дури и кога патот е тежок и исполнет со предизвици. По професија сум дипломиран економист. Низ годините ме привлекуваше козметиката и така се решив да се надоградувам и на тоа поле и ден денес уживам во мојата понова професија. Најважно од сé ми е што моите клиенти се среќни кога излегуваат од салонот и секогаш се со истиот исказ „ЕДВАЈ ЧЕКАМ ДА ДОЈДАМ ВО ТВОЈОТ САЛОН“. Тоа е уште поголема мотивација да одам напред.
Читај БЕ: По што твојот салон се разликува од другите салони за убавина?
Христина: Секогаш се надоградувам со знаење на повеќе области од козметиката кај што можам да ја издвојам и најбараната услуга во овој период – Ласерска епилација, трајно отстанување на несаканите влакна.
Читај БЕ: Кои услуги се најбарани кај твоите клиенти?
Христина: Во моментов, најбарани услуги кај нашите клиенти се маникир и педикир, кои се секогаш омилени за одржување на совршен изглед на рацете и нозете. Покрај тоа, голема побарувачка има и за различни третмани за слабеење и обликување на телото, како и за третмани на лице кои помагаат да се одржи здрава и блескава кожа. Секогаш се трудиме да понудиме услуги кои ги задоволуваат потребите и желбите на нашите клиенти, без разлика дали станува збор за релаксација, нега или естетика.
Читај БЕ: Кои трендови во убавината моментално се најпопуларни?
Христина: Тренд во убавината и вистинско задоволство можам да кажам дека е секоја негувана и внимателно одржувана личност. Ние постојано ги следиме најновите трендови, прилагодувајќи ги според можностите и потребите на нашите клиенти, за секој да добие персонализирана нега и изглед што го сака.
Читај БЕ: Која е најубавата пофалба што си ја добила од клиент?
Христина: Секој ден од клиентите добивање по некој подарок и пофални зборови ама најголемо задоволство ми е кога ќе ме прашаат МОЖЕ ДА ТЕ ГУШНАМ и верувајте нема поубаво чувство.
