Оваа година по 23 пат ќе се одржат Пелагонските културно –научни средби во Новаци. Целта на овие средби е да се промовира научната мисла на луѓето кои потекнуваат, некои сѐ уште живеат во живописниот Пелагониски предел, ако се земе предвид дека голем број од интелектуалците во Македонија се токму по потекло од Пелагонискиот регион.
Средбите низ годините востановија две награди, кои традиционално се доделуваат, па така оваа година наградите за:
Повелба за животно дело му се доделува на: проф. д-р Осман Кадриу
Златен клас за македонски вознес му се доделува на: поетесата Снежана Алексиќ Станојловиќ од Нови Сад, Р. Србија
Од оваа година во чест на поетот на Битола, кој беше и еден од стожерите на Пелагонските културно – научни средби, Панде Манојлов, се воведува награда која го носи неговото име, со цел да се мотивира уметничкото творештво кај помладата книжевна генерација, а наградата ја добива младиот поет Филип Димкоски.
Здружението Пелагонски културно – научни средби со седиште во Општина Новаци започна во полн ек со подготовка на годинешнава манифестација, на чело со претседателката д-р Весна Калпаковска и нејзините соработници, покрај промоција на научната, напоредно се промовира и уметничката мисла.
Прв претседател на Средбите е етаблираниот македонски писател д-р Цане Здравковски, кој беше по потекло од пелагониското село Врањевци, на чија денешна територија е изграден Рударско енергетски комбинат.
