Повеќе од 70 – тина битолчани денес, недела, 30.10.2022 година зедоа учество во акцијата за обнова на „Копанки”.
Присутни беа планинари, скијачи, други спортисти, љубители на природата, членови од други здруженија на граѓани, Членови на Советот на Општина Битола, битолчани од сите возрасти, од седум до седумдесет и седум години.
Низ работата, повозрасните говореа за едно минато време на „Копанки”. Најинтересно беше сеќавањето на Кире Марков за далечната 1964 година, кога на многу мала возраст со помош на дрвена тезга вршеле дотур на камен од камењарот за доградба на домарските простории.
На денешната акција за обнова на „Копанки”, присутните изразија задоволство од пред сè убавата дружба, смеа и убавата работна атмосфера.
Од вчера, ПСК Пелистер ги започна подготвителните активности за обнова на „Копанки”, кои опфаќаат транспорт на градежни материјали до самиот планинарски дом, откако Општина Битола издвои финансиски средства наменети за „Копанки“.
