По повод 2-ри Април, Светскиот ден за одбележување на аутизмот, во битолската зоолошка градина се организираше настанот под мотото „Заедно можеме повеќе, заедно можеме се“ кој вклучи дружба во Золошката градина во Битола на деца со атипичен и типичен развој.
Преку овој настан сакаа на симболичен начин да ја подигнат свесноста за аутизмот. Испратија порака до сите дека она што не прави различни, во тоа е убавината, дека заедно можеме многу повеќе и можеме се и да ја подигнеме симболично свесноста за аутизмот кај сите нас.
„Овој ден значи многу со тоа што сакаме меѓу луѓето да се подигне свесноста за аутизмот, каков е што е и дека тоа е нешто што е со нас, до нас и не треба да се плашиме од него. Денешниот настан е поддржан од здружението „Хармоничен свет“, поддршка имаме и од Ротари клуб Битола, исто така од здружението „22 Неноти“, исто така од мајка на дете со нетипичен развој, Ана Ѓорѓиев, а ја изразуваме и благодарноста кон Зоолошката градина во Битола која ни излезе во пресрет. Целта на настанот беше дружба на деца со типичен и атипичен развој, бидејќи годинешното мото на 2 април е „Инклузијата е она што треба да го постигнеме“. Мојата идеја за овој настан беше „Заедно можеме се, заедно можеме повеќе“ бидејќи децата се сите исти, децата се сакаат, децата треба да живеат, да функционираат и да се радуваат заедно, а возрасните се тие кои ги прават поделбите. Затоа ја одбравме таа тематика и организиравме дружба во ЗОО Битола на децата со типичен и атипичен развој и симболично испративме 99 балони кон небото за да ја одбележиме слободата и внатрешниот мир кој сите го заслужуваме и го бараме на крајот на денот, изјави д-р Билјана Гагачовска, субспецијалист по детска и адолесцентна психијатрија, која беше иницијатор на овој настан.
