По 15-ти пат во чест на Свети Наум Охридски се одржа поклоничкото патување „По стапките на нашите предци“ во организација на Х.О Утешител и на Центарот за Православна христијанска веронаука Св.Нектарие Битолски. На поклоничкото патување кое започна во саботата наутро, а заврши вчера на празникот посветен на овој светец, присуствуваа околу 50 верници кои пешачеа околу 10 часа.
„Дел од групата беа и деца, но и 60-70 годишни поклоници. Патеката е околу 25 км. Пешачевме со многу паузи заради постарите. Кога се префрли планината, кај крстот кој ние го поставивме, читавме акатист на Св. Наум охридскиот чудотворец“, ни раскажа Драги Атанасовски кој потенцираше дека покрај од Битола, поклоници од Прилеп досега имале повеќе пати, а прв пат имаа гости од Скопје и Велес….
Се трга од село Лескоец – Преспа, па преку пресеката на планината, под сенката на високата букова шума, на Националниот парк Галичица, се пешачи до под врвот Магаро. Потоа патот продолжува под зимзелена и листопадна шума, по осветеното планинско патче, газено од илјадници верни души низ вековите, се до манастирот Св.Наум – Охридскиот чудотворец.
