Осмото издание на Џез Фактори Фестивал Битола ќе се одржи од 17 до 19 април, со настапи на истакнати џез музичари од Македонија и странство во Народниот театар, Центарот за култура и неколку кафе барови.
Директорот и основач Сашо Поповски потсети дека фестивалот потекнува од работилниците „Jazz Factory for Kids“ започнати во 2011 година. Тој изрази благодарност до Народниот театар, Општина Битола, Центарот за култура и Министерството за култура за поддршката.
Фестивалот започнува на 17 април со настап на францускиот пијанист Laurant Coulondre и американскиот мултиинструменталист Corey Wilcox со WORKING CLASS HEROES.
Компанијата МИНТ донира контрабас, значаен инструмент за фестивалот. Програмата вклучува и џез работилница за деца, со цел едукација и создавање млада публика.
„Младите треба да се запознаат дека постои малку поразлична музика од таа што им се сервира секој ден и дека музиката од цртаните филмови може да биде изведувана во живо на инструменти. Создавањето на публика не зависи само од фестивалот, потребно е да се има сериозен џез клуб во Битола, нешто што долги години ние го немаме и мислам дека тој дисбаланс кој што се јавува во моментов е токму поради тоа што сега уште немаме сериозен џез клуб во градот, па можеби сето ова ќе поттикне некого за постоење на истиот“, рече Поповски.
Ќе се додели и наградата „Гоце Димитровски“ на младиот џез музичар Теодор, кој ќе учествува на мастер клас во рамките на Нишвил фестивалот.
Поповски нагласува потреба од отварање џез клуб во Битола и подобра интеграција на џезот во образованието, како и поддршка за изборни предмети по џез во средните музички училишта.
На 18 април ќе се претстави книгата Press and Play на Ненад Георгиевски, а ќе се одржат и настапи на Jaume Miquel Trio, Swantje Lampert и квартетот на Јован Цветковиќ. На 19 април ќе настапат КОД 369, JFF Little Big Band и ќе се одржи Годишната конференција на Асоцијацијата на џез фестивали.
Фестивалот се организира под покровителство на Општина Битола и со поддршка на повеќе културни институции и амбасади, со повеќе од 2000 посетители годишно.
