На 24 јуни, православната црква ги празнува Светите апостоли Вартоломеј и Варнава, во народот познати како Вртолом. Овој ден, според народното верување, го означува моментот кога „сонцето се врти кон зима“ – деновите почнуваат незабележливо да се кратат, а природата го започнува својот премин кон втората половина на годината.
Свети апостол Вартоломеј беше еден од дванаесетте Христови апостоли. По Воскресението на Спасителот, го проповедал Евангелието во Индија и Ерменија, каде претрпел маченичка смрт заради својата вера.
Свети апостол Варнава, пак, беше еден од седумдесеттемина апостоли и придружник на апостол Павле во неговите мисионерски патувања. Родум од Кипар, тој неуморно го ширел Божјото слово меѓу незнабошците, а според преданието, првиот ја проповедал Христовата вера на Кипар, каде што подоцна и маченички пострадал.
Овој ден во народната традиција се смета за пресвртница, кога „сонцето застанува и се врти“, што се поврзува со завршетокот на најдолгите денови и почетокот на нивното скратување. Според обичаите, се верувало дека времето денеска ја предвестува плодноста на летото и есента, па затоа се одбележувал со молитви за бериќет и здравје.
