„Нова страна” е песната со која Виктор Апостоловски настапи на годинешното 37-мо издание на „Макфест“ кој се одржа на 21 и 22 октомври во Штип.
Песната иако напишана пред повеќе години, конечно ја виде „светлината на денот“ на Макфест. Виктор за Читај бе вели дека песната „Нова страна“ носи позитивна порака.
„Па мислам дека дефинитивно е крајно време да свртам „Нова страна” после Супермен! ? До сега требаше да излезат неколку нови песни, но поради склоп на околности, премногу обврски и едно, фала Богу бериќетно лето, конечно најдов време да извадам нешто ново. Иначе песната е напишана уште 2016/17та година. Прво беше англиска, па беше англиски дует, па потоа беше пак соло, но овој пат македонско/англиско/шпанска верзија, за на крај да направам целосно македонска верзија за Макфест. Потоа ја слушна Дојчин, ја бендиса, па додаде малку магија, потоа тука се приклучија и танцовиот клуб Брејк д флор од Штип за сето тоа на крајот да изгледа како што изгледаше на сцената. Ова ми е втора соработка со Дојчин, а веќе не знам која со Брејк д флор, така што ептен сум задоволен од финалниот продукт. Песната носи потполно позитивна порака, и за да успееме да пренесеме што подалеку, за неколку дена ќе снимиме и позитивно спотче, заедно со децата од Брејк д Флор, но овој пат во Свети Николе! Па здравје, очекувајте ново видео за недела дена!“, вели Виктор.
