По повод Денот на детето во Трабзон, Турција, беше отворена третата традиционална изложба на 65 слики од деца и млади ликовни уметници, како и талентирани учесници од 20 земји.
Ликовната изложба, насловена „Децата на светот во Трабзон“, се одржа во рамките на „23 април – Ден на националниот суверенитет и Денот на детето“ во Турција – земја која прва во светот го прославува Денот на детето како национален празник.
Изложбата третата година по ред се реализира со поддршка како проект од национален интерес од Министерството за култура и туризам на Македонија. Организаторите ја спроведоа во соработка со Сојузот на комори на турски инженери и архитекти (TMMOB), Комората на архитекти – филијала Трабзон, како и со уметничкиот едукатор, професорот Вејсел Аџар. Поставката беше отворена за посетители во галерискиот простор на Комората во периодот од 20 до 28 април 2026 година.
Изложбата за отворена ја прогласи Славчо Неделковски, претседател на манифестацијата „Мал битолски Монмартр“, а поздравни обраќања имаа и градоначалникот на општина Трабзон – Ортахисар, Ахмет Каја, градоначалникот на град Трабзон, Ахмет Метин Генч, претставник од Комората на архитекти на Трабзон и професорот Вејсел Аџар.
„Оваа година имам чест по трет пат да ве поздравам со изложба на селектирани дела од 44. издание на светската детска ликовна колонија ‘Мал битолски Монмартр 2025’ во Трабзон и, како и секогаш, со нова креативна порака.
Во година кога се одбележуваат речиси 60 години постоење на нашата организација, а пред нас е и јубилејното 45. издание на колонијата, сакам да истакнам дека Турција низ годините се позиционира високо на глобалната мапа на креативни и талентирани млади уметници. Токму затоа, нашата стручна жири-комисија предложи да поканиме не една, туку четири делегации од Турција – две од Трабзон и по една од Кајсери и Сакарја.
Тоа е доволна причина денес да бидете горди на вашите млади ликовни уметници!“, истакна Неделковски.
Професорот Вејсел Аџар, во име на Комората на архитекти на Трабзон, ѝ додели плакета-признание на претседателката на Детското ликовно студио „Свети Кирил и Методиј“ од Битола, Елена Хаџи-Антоновска, за долгогодишната соработка (повеќе од 20 години) и успешната реализација на третата изложба во Трабзон.
Во своето обраќање, Хаџи-Антоновска ја истакна значајната улога на професорот Аџар, кој веќе 22 години континуирано учествува на „Мал битолски Монмартр“. Годинава тој е добитник на високото признание – Орден за педагошки вредности во ликовната уметност кај децата, доделен по повод 45-годишнината на манифестацијата. Неговата ученичка, Зејнеп Бејза Алтунташ, е добитничка на наградата „Мал битолски Монмартр“ за ученици кои покажале исклучителен континуиран успех, со учество на колонијата во период од 5 до 10 години.
Во оваа прилика, Неделковски и Хаџи-Антоновска потврдија дека за годинашното издание на колонијата веќе е пријавено и потврдено учеството на 20 делегации од 17 земји, односно над 160 учесници.
