Младата македонска музичка надеж, Тамара Грујеска под менторство на Тони Алексовски, со голем успех се враќа од фестивалот “GREECE`s HOPE” во Nafplio (Пелопонез) и освоени две награди – прво место и Гран При. Тони Алексовски за Читај бе ги сподели импресиите и големиот успех на Тамара:
„Среќни и задоволни се вративме од уште гостување надвор од границите на нашата држава! Заврши фестивалот “GREECE`s HOPE” во Nafplio (Пелопонез), ние сме веќе дома, полни со емоции, музика, љубов… среќни и радосни!
Учесници од Ерменија, Шведска, Молдавија, Литванија, Швајцарија, Естонија, Грција, Словенија, Казахстан, Романија, Латвија, Бугарија, Полска и други… и ние како единствени претставници на Македонија – нашата прекрасна гостиварчанка Тамара Грујеска, која настапи во категориите поп и рок вокал, освојувајќи го првото место во едната категорија и Гран При наградата во втората номинација на фестивалот и јас, Тони Алексовски, како член во многубројната жири комисија.
Тамара ги освои симпатиите на учесниците и жирито и гордо ги подигна пехарите за освоените награди и признанија! Тамара беше претставник и учесник и на детската евровизија во Ница, Франција, а исто така веќе две години настапува на интернационалниот музички фестивал MUSICLAND настапувајќи на финалната гала претстава, придружувана од Камерниот оркестар на Битола.
Прекрасни мигови поминати на брегот на тиркизното море, денови исполнети со многу песни и нови пријателства, сонце, насмевки! Ветуваме дека ќе продолжиме со успешната работа и понатаму, откривајќи нови хоризонти, во освојување на уште многу награди и достојно претставување на нашата земја низ новите предизвици кои ги имате во нашата агенда!
Тамара, посакуваме уште многу пати да не направиш горди, како што ти знаеш и умееш! Одиме понатаму – со песна од срце! Со среќа!“
