Општина Новаци ќе биде домаќин на 22. „Пелагонски културно научни средби“ на 15 октомври. Станува збор за манифестација кога ги промовира и афирмира македонските научници и културни дејци од пелагонискиот регион и пошироко.
На Средбите традиционално се доделуваат наградите „Повелба за животно дело“која оваа година му се доделува на публицистот Славе Николовски Катин и „Златен клас за македонски вознес“ на Виктор Бивел афирматор на Македонија во Австралија.
Во свечениот дел од манифестацијата ќе биде промовиран 17 Зборник на трудови финансиски поддржан од Министерството за култура на Македонија, во кој се сместени 40-тина научно-книжевни трудови.
„Пелагонските културно – научни средби“ оваа година реализираат низ настани посветени на 120 години од раѓањето на првиот македонски романописец Стале Попов (1902-1965) роден во селото Мелница, Маривско. По тој повод на 17 и 18 октомври во Офицерски ќе се одржат книжевни работилници „Стале Попов-чувар на македонскиот збор“ како дел од офф програмата на Битфест’22.
Учениците од ООУ „Славко Лумбарковски“ од Новаци подготвија ликовни дела и есеи инспирирани од делата на С. Попов. Со историчарот Васко Гичевски е снимен разговор за книжевниот, социјалниот и историскиот моментум во делото на Стале Попов и зошто тој е посебен, информира д-р Весна Калпаковска, претседател на Пелагонски културно – научни средби.
