Повторно се враќа трендот на шиење уникатни фустани за матурските прослави, вели Вера Попчановска, сопственик на занаетчиски дуќан за шиење и кројачки услуги во Битола. Имало интерес кај младите, а како што се наближуваат матурските прослави, веќе се прават плановите за креацијата со која ќе блеснат на матурската ноќ. Вера смета дека повторно треба да се врати тој тренд на шиење матурски фустани, младите да создаваат сопствени креации, по сопствен вкус.
„Да се врати идејата на младите да создаваат сопствени креации, да прават индивидуални фустани, здолништа. Сега се ближат матурските, да не бидат сите во исти тоалети – направете нешто индивидуално, побарајте било кој шнајдер. За жал пандемијата си го направи своето, но сега повторно има интерес и порачуваат фустани за матури. Имаат различни идеи и ми се допаѓа што се враќа стилот на претходните модели од пред 20-тина години. Се прават комбинации на модерното и традиционалното, има нови материјали кои можат да се искористат и може да се дојде до многу убави модели“, вели Вера.
Во меѓувреме, пандемијата ги погоди многу кројачките дуќани. Со шиење на маски, а сега и со платнените торби се вадеше некој денар, иако со минимална заработувачка, вели Вера. Битолчани досега немаа многу навика да употребуваат торби од материјали, но одлуката за забрана на пластичните кеси, ја разбуди креативноста во нив. Побарувачката се зголеми, а се позаинтересирани се и младите.
„Младите имаат побарувања, имаат идеи, бараат еднобојни и печатат на нив различни лога. Ги користат како чанти, се прави некоја навика. Најчесто повеќе другарки повеќе доаѓаат и си порачуваат“, вели Вера.
Како занаетчии апелираат да се употребуваат што повеќе торби од природни материјали со цел да се заштити околината.
