Блаже Докуле, Петар Ставрев, Петар Мирчевски, Владимир Костов се само дел од познатите битолски личности кои ја инспирираа битолската карикатуристка, Кети Радевска за да нацрта неколку познати битолчани преточени во портрет катикатури.
Кети постојано црта и учествува на натпреварите и конкурсите за карикатура насекаде низ светот на различни теми кои се зададени. Таа често црта писатели, карикатуристи, актери, пејачи, политичари.
„Некако ми дојде идеја и инспирација да направам неколку ликови од Битола бидејки досега не се организирал некој конкурс за наши македонски ликови кои се познати и почитувани, па така јас решив да изработам нешто. Инаку се занимавам околу 30 години со уметност, сликарство и карикатура. Со карикатурата затоа што ме привлекуваше тоа да биде хумористично и притоа да се претстави ликот со тоа што ќе вметнам во цртањето карикатури и нивно хоби, професија кога се работи на портрет карикатура. Не е лесно, треба многу внимание и посветеност за да се изработи една карикатура и зависи од ликот. Некои ликови се многу лесни и брзо се цртаат, а за други треба повеќе време. Имам многу фестивали каде имам учествувано и учествувам, имам голем број награди,признанија, сертификати и дипломи.
Карикатурата е да нé насмее пред сé, реалноста да ја прикаже преку хумор, но и да даде порака. Додека портрет карикатурата е посложена, но мене ми е приоритет и често цртам портрет карикатури. Тука се гледа карактерот на ликот, да се долови максимално и тука се вметнува хоби, професија за да се долови во целост“, вели Кети за Читај бе.
Кети има нацртано многу портрет карикатури кои учествувале на фестивали низ светот на кои се нацртани артисти, уметници, музичари, политичари итн. Нејзината карикатура од Елтон Џон беше на изложба во Националната галерија во Сиднеј, Австралија.
