Синоќа на платото на Офицерскиот дом во Битола се одржa вториот концерт од караванот „Македонијо во срце те носиме”. Концертот предизвика голем интерес кај битолчани кои дојдоа во голем број и уживаа во изведбата на 12-те најубавите македонски легендарни песни чија преработка во современ аранжман ја направи познатиот композитор и музичар, маестро Николче Мицевски.
На сцената публиката ги слушна Бојана Скендеровски, Сузана Спасовска, Наум Петрески, Зуица Лазова, Андријана Јаневска, Александар Тарабунов, Огнен Здравковски, Марија Спасевска, Мина Блажев, ДНК, Ламбе Алабаковски и Миле Кузмановски. Носител на проектот е Скендеровски продукција, чија цел е да се зачува музичкиот аманет кој го оставиле претходните генерации.
На воодушевување на битолчани, концертот беше збогатен со членовите на битолската коњаница Галоп кои со факли и развеани знамиња уште повеќе ја загреаја атмосферата пред Офицерскиот дом.
