Божиќната ѕвезда е цвеќе кое сиот свој раскош и убавина го појавува во зимскиот период за време на божиќните празниците од каде и го добила името Божиќна ѕвезда.
Божиќна ѕвезда или Euphorbia pulcherrima е растение кое потекнува од Мексико. Расте во вид на жбун и ја има во повќе бои, од црвена, жолта, портокалова, крем па до бела. Поради нејзината убавина последните години тренд е да биде неизоставен декор за време на Божиќните и Новогодишните празници. За да уживате подолго време во нејзините цветови (кои се всушност обоени листови) треба да внимавате на нејзината нега.
Божиќната ѕвезда не сака многу топлина
Добро е да ја ставите на поладно место особено додека е во фаза на цутење. Никако не ја ставајте во близина на радијатор или пак друго грејно тело. Најмногу ѝ одговара температура од 12-20°Ц. Не обожава ниту провев.
Наводнување
Треба многу да се внимава да има доволно влага. Не треба да се претера а ниту да се остави сува. Пред да ја наводните проверете ја земјата во саксијата. Премногу влага може да доведе до пожолтување на листовите и нивно опаѓање. Исто така многу вода може да доведе до гниење на коренот. Недостиг на вода ќе предизвика паѓање на листовите. Не треба да се остава вода во подлошката. Најдобро е да се наводнува на секои 2-3 дена. Добро е зелените листови да се оросуваат.
Прихрана
Во зимскиот период не мора да се прихранува. Може еднаш месечно да се дава прихрана додека е во фаза на раст.
Период на мирување
Откако ќе испаднат цветовите божиќната ѕвезда преминува во фаза на мирување и може да се премести на поладно место. Овој период трае до месец април
Кратење на гранките и пресадување
Потребно е да се пресади во друга саксија и да се смени земјата. Да се додаде околу 15% песок. Гранчињата се сечат на висина од 10см. Ова е потребно со цел да пораснат нови гранчиња. Местата каде што се пресечени треба да се заштитат со восок бидејќи истекува бела течност.Не треба да се дозволи истекување на таа течност бидејќи нема да процвета. Белата течност е многу отровна и треба да се чува цвеќето надвор од дофат на деца. Доколку при сечењето ви капне на кожата, веднаш да се измие со вода за да се избегнат несакани последици.
Кон крајот на јуни може цвежето да се изнесе надвор на топлина и светлина. Тогаш е во полн раст и може да му се додава прихрана. Кога ќе настапат студените денови се преместува во затворена просторија, најдобро до прозорецот.
Во есен Божиќната ѕвезда се преместува во темна просторија. Доколку е изложено на светлина ќе се наруши цветањето на обоените ливчиња.
