На 16-ти јуни, во Националната опера и балет, Кирил Џајковски одржа целовечерен концерт, придружуван од 30-член оркестар под диригентската палка на Џијан Емин. Уште еднаш се потврди дека музичкиот јазик на Џајковски има уникатна вредност што е препознаена од публиката.
Вчерашниот концерт беше резиме на творештвото на Кирил во применетата, филмска музика — комплексно патување низ неговите дела, каде што публиката не остана само пасивен консумент, туку се ангажираше како проактивен учесник.
Концертот започна со антологиските музички парчиња од филмот Прашина, а продолжи со познатите теми од Балканот не е мртов, Врба, Бал-кан-кан, Piargy, Трето полувреме — со што публиката се присети на легендарните музички теми кои беа неизоставен дел од овие филмски остварувања. Филмската музика на Кирил не само што ги надополнува и издигнува филмските сцени, туку живее и независно од филмот.
Еден од највпечатливите моменти на концертот беше изведувањето на темите од филмот Големата вода, кои важат за едни од највпечатливите дела од македонската филмска музика, но и сведоштво за раскошниот талент на Џајковски.
Крешендото на ова композиторско волшепство беше заокружено со хорска придружба во последниот дел од концертот. Кирил уште еднаш потврди дека со своите уметнички визии и композиторски капацитет претставува уникатно современо културно наследство.
Концертот беше одлична можност еден од најпродуктивните композитори на филмска музика на Балканот да го претстави својот извонредно обемен и исклучително значаен опус пред македонската публика. Проектот ќе го продолжи својот живот со настапи низ регионот и Европа во периодот што следува.
фотограф: Кире Галевски
