Сунај Мифтар од Битола, дипломиран студент на Факултетот за физичко образование, спорт и здравје е кикбоксер кој целосно се насочи кон зајакнување и надоградување на себеси со цел да ја развива кикбокс кариерата. Сунај Мифтар има учествувано на повеќе натпревари како на национално, така и на интернационално ниво. Искуството на Мифтар ни зборува за борбите со престижни и доста квалитетни противници со кои се соочил во својата кариера досега. За борбите, натпреварите, импресиите, ефектите и последиците од истите повеќе ќе дознаеме од интервјуто со Сунај Мифтар за Читај бе.
Читај бе: Сунај, пред да навлеземе подлабоко во темата, би сакала кратко да го споделиш со нашите читатели твоето искуство во кикбоксот. Колку долго тренираш кикбокс, што сé е потребно за да напредуваш во овој спорт и колку време ти беше потребно додека да собереш храброст и сила за првото односно почетничкото натпреварување?
Сунај: Кикбокс тренирам повеќе од половина мој живот,започнав во 2009 година на моја 10 годишна возраст па еве веќе 13 години кикбоксот е мој живот.
Уште од самите мои почетоци никогаш не бев најталентираното, најпреспективното или најдоброто дете во клубот но љубовта кон спортот, посветеноста и напорната работа ме направија да бидам тоа што сум денес и токму тие фактори би ги наведил како главни за напредок во спортот, а и општо во животот.Според мене границата помеѓу храброста и лудоста скоро не постои, па така и јас по само две недели тренирање доброволно се пријавив на моето прво интерно клубско такмичење на кое што успеав да издвојам победа на првата борба и пораз во финале.
Читај бе: На колку натпревари си учествувал и кои награди си ги освоил?
Сунај: До сега сум учествувал на повеќе меѓународни аматерски натпревари во различни федерации и голем дел од нив сум ги освоил, а сега веќе запливав и во професионалните води со резултат од 4 победи и 2 порази.
Читај бе: Колку дозволуваш овој спорт да влијае врз твојата психичка состојба и како успеваш да ја контролираш оваа состојба пред моментот на настап на кикбокс сцената?
Сунај: Одговорот на ова прашање би го започнал со еден цитат од славниот уметник Винсент ван Гог: „Ги ставив моето срце и душа во мојата работа и го изгубив умот во тој процес.” Со ова сакам да го нагласам влијанието на овој спорт врз мојот живот и мојата психичка состојба. Едноставно кикбоксот е мојот живот, јас сум кикбоксот. Не знам што би бил во животот ако не кикбоксер. Самата оваа помисла ми помага да се справам со притисокот, стресот, стравот и адреналинот пред борба. Бидејќи јас сум сонувал и сé уште сонувам за овие измешани емоции. Сум сонувал за соочувањето со противникот на контролното мерење, извикувањето на моето име пред публика, патот кон рингот и самата борба. Во мене се буди чувство кое не можам да си го објаснам ни на самиот себе.
Читај бе: Можеш ли да ни доловиш дел од емоциите со кои се соочуваш откако ќе излезеш како победник и оние емоции кои се јавуваат при пораз? Која е разликата и што сé си научил од ваквите искуства?
Сунај: Победата и поразот се брат и сестра. Никогаш не смееме да дозволиме победата да делува врз нашиот мозок и поразот врз нашето срце. Спортот како и животот е полн со подеми и падови, но на крај само најупорните успеваат.
Во мојата кариера сум имал победи од кои воопшто не сум задоволен од самиот себе и порази од кои сум задоволен од мојот пеформанс и сум научил огромни лекции кој ја градат мојата личност и кариера.
Читај бе: Што се е потребно за одржување на менталното и физичкото здравје при подготовката за настап на кик бокс сцената?
Сунај: ТРЕНИНГОТ, напорната работа е лек за одржување на моето ментално здравје. Не ги потценувам другите спортови кои се игри, но за разлика од нив боречките спортови конкретно кикбокост не е игра. Во нашиот спорт не постојат изговори од типот: „добра асистенција направив, ама напаѓачот не даде гол”, нема кој да нѐ замени доколку не „играме” добро. Затоа сите борци треба сериозно да си ја сфатиме оваа работа која е модерно гладијаторство. Јас лично мислам дека победата е резервирана за оние кои се подготвени да ја платат нејзината цена. Затоа напорната работа е на прво место во мојот живот, што повеќе тренирам толку повеќе верувам во себе. Правилната исхрана, соодветниот тренинг и одморот се клучни за одржување на физикото здравје на еден борец или спортист.
Читај бе: Доколку има едно нешто кое би сакал во иднина да го промениш во кикбоксот, кое би било тоа нешто?
Сунај: Боречките вештини и спортови сите се слични едни на други, кога ги гледа некој лаик тешко е да најде разлика помеѓу нив, а за тоа да биде уште покомплицирано кикбоксот покрај тоа што се дели на аматерски и професионален се дели и на уште 6 други натпреварувачки дисциплини и настанува тотален хаос кај гледачите. Затоа би сакал кикбоксот да се доведе на една дисциплина која ќе биде поделена на аматерски и професионален кикбокс.
