Во Прилеп од 5 до 12 јуни 2026 година ќе се одржи јубилејното 60. издание на Македонски театарски фестивал „Војдан Чернодрински“, кое годинава ќе понуди богата програма со десет претстави во официјална конкуренција и четири во придружната програма.
Фестивалот ќе се одржи под мотото „Храбриот нов театар“, со тематски фокус на „кризата на човекот во општеството и кризата на општеството во човекот“. Програмата денеска ја соопшти уметничката директорка и селектор, Ана Стојаноска, на прес-конференција во Центар за култура „Марко Цепенков“.
Отворањето на фестивалот ќе биде со претставата „Мачкина глава“ од Венко Андоновски, во режија на Дејан Пројковски, во продукција на Драмски театар – Скопје. Затворањето е резервирано за гостувањето на Белградското народно позориште со претставата „Црно злато“, во режија на Оливер Фрљиќ, по текст на Дејан Дуковски, кој е автор во фокус оваа година.
По повод јубилејот, Собранието на фестивалот додели четири награди за животно дело. Добитници се Атила Клинче, Сашо Миленковски, Љубомир Чадиковски и Веби Ќерими.
Дополнително, по предлог на семејството на Кирил Ристоски, наградата за главна машка улога од оваа година ќе го носи неговото име.
Селекторката Стојаноска посочи дека изборот на претставите бил особено предизвикувачки, нагласувајќи дека во тековната продукција доминираат ограничен број режисерски имиња и недостига современ пристап кон македонската драма. Според неа, современиот театар треба јасно да ги адресира општествените аномалии и да понуди силен авторски став.
Во официјалната програма се вклучени претстави како „Амадеус“, „Едмонд“, „Калигула“, „Носорози“, „Црнила“ и други, додека придружната програма ќе понуди четири дополнителни театарски остварувања.
За наградите ќе одлучува жири-комисија составена од Снежана Конески-Руси, Дарко Лукиќ и Аида Буквиќ.
Во рамките на фестивалот ќе бидат организирани и изложби, промоции, студентски перформанси, како и „Музеј во движење“, посветен на творештвото на актерите Благој Ивчески, Лидија Иваноска и Трајче Иваноски.
