Синоќа во Офицерскиот дом беше отворена изложбата насловена како „Половина век современа карикатура“ на познатиот карикатурист Блаже Докуле, можеби најнаградуваниот македонски карикатурист, мајстор на сатирата и цртежот.
Дел од изложбата беа 35 негови карикатури кои биле наградени на едни од најпрестижните меѓународни фестивали на сатира и карикатура.
Изложбата ја отвори проф.д-р Александар Стерјовски, на кого Докуле му подари што друго ако не – карикатура.
Блаже Докуле има свој препознатлив изграден стил кој се појавува во повеќе форми како класичен цртеж, како стилизиран „кроки“ и како чист „кроки“ и ги користи сите техники при својата работа како што се: туш, пастел, акварел, темпера, моливи во боја и други техники при што постигнува силен колорит во делата. Во текот на 50 години творештво, работел за над 40 списанија, весници и магазини, а негови карикатури се објавувани насекаде низ светот.
