24-годишниот Мартин Митрески со одлични резултати се врати од Белград каде учествуваше на маратонот организиран од здружението Маратон Маратона. Тој заврши како четврт, и покрај тоа што трката се одвиваше во тешки временски услови, ноќе и на ниски температури.
Инаку Мартин е роден во Прилеп, но веќе 16 години е преселен и живее во Битола. Со спорт се занимава уште од мали нозе.
„Започнав со тренирање фудбал во школата Пелистер и уште од тогаш ми се јави љубов кон атлетиката и трчањето. Бидејќи од секогаш сум сакал предизвици на првиот маратон се пријавив самоиницијативно кој се одржа на Планината Баба како вид планинарски полумаратон од 18 километри кој беше организиран од планинарското друштво Димитар Илиевски Мурато во Август 2020 година.Ми беше еден голем предизвик да истрчам 18 километри кој ми изгледаше нешто невозможно за мене во тој период. По успешното завршување на овај полумаратон решив дека сакам се повеќе да се надминувам себе си и почнав со активно пријавување на повеќето полу маратони, маратони и ултра маратони“, вели Мартин за Читај бе.
Тој досега има учествувано на повеќе од 20 манифестации, а кулминацијата е токму последната трка во Белград на Ада Циганлија организирана од Српското здружение Маратон Маратона која се одржа на 10 Април 2022 година.
„На оваа трка имаше учесници од Романија, Хрватска, Србија,Тунис и јас како единствен тркач од Македонија. Целта на ова трка беше активно трчање 12 сати кое започна во 17 часот и траеше до раните утрински часови односно до 05 часот. Трката ја завршив на четврто место со истрчани 94км и 683м. Трката беше доста исцрпувачка поради временските услови и ладното време кое падна до 1 степен, но мојата желба и волја да ја завршам трката беше поголема од сите пречки и потешкотии што ми излегоја во текот на трката. Најбитното за да се истрча еден ваков маратон е желбата, љубовта и физичката подготвеност. Мојата наредна цел е ултра “trail” маратонот на Пелистер 104км“, рече Мартин.
Читај бе му посакува на Мартин уште многу учества на трки, полумаратони, маратони и ултрамаратони, се разбира закитени со медали.
