Во хотелот “Молика“, во организација на Центарот за личен развој, психотерапија и едукација Анима, успешно се реализира Втората гешталт конференција „Гешталт терапија во секојдневното живеење овде и сега”, на која зедоа учество околу 50-тина учесници која траеше од 5 до 7 јули.
На конференцијата со свои стручни предавања и работилници, се претставија околу 20-тина излагачи – панелисти, кои презентираа свои стручни трудови од областа на гешталт психотерапијата, а беа реализирани и повеќе работилници, кои беа интерактивни, на кои учесниците имаа можност не само да се запознаат со теоријата на гешталт терапијата, туку и искуствено да доживеат и да работат на себе. Оваа конференција е поддржана од Комората на психолози и претседателката д-р Мирјана Јовановска Стојановска.
-Би сакала да изразам огромна благодарност и задоволство што имаме можност да организираме ваква конференција, која се одржува втор пат. Првата гешталт конференција се одржа пред две години по повод 25 години постоење на гешталт психотерапија во Битола и Македонија. Им благодарам на сите кои зедоа учество и овозможија оваа конференција да стане незаборавно и трансформирачко искуство. Исто така, особено сум горда што нашиот центар Анима, ја доби првата генерација дипломирани гешталт психотерапевти и гешталт советници – истакна Вера Димовска, сениор тренер, психолог, гешталт психотерапевт и прв човек на Анима.
Учесниците на конференцијата имаа можност да се запознаат, преку излагањата на панелистите, со основите на гешталт терапијата, со придобивките од гешталт психотерапијата за менталното здравје, за моќта на гешталт пристапот во организациски системски промени, за тераписката работа и како се одвива еден тераписки процес, за примена на гешталт терапијата при работа со нарцисоидно пореметување на личноста, како и примена на гешталт при работа со еготизам и шизоиден карактерен стил, работа на свесноста за сексуалноста во секојдневното живеење, а преку искуствените работилници се запознаа како се работи на агресијата со примена на гешталт техники, работа на лутината, работа на соништата, како и со важноста на процесот на дишење во секојдневниот живот.
