Во пресрет на 14 ноември – Светскиот ден на дијабетот, Самостојниот синдикат на работниците од Енергетика, Рударство и Индустрија на Р. Македонија (ССЕРИ) при Конфедерацијата на слободни синдикати на Македонија, во Подружница РЕК Битола организираше видео презентација посветена на справувањето со состојбите поврзани со дијабетот на работното место.
Според претставниците од Сојузот на дијабетичари на Македонија, кои остварија интерактивна средба со присутните работници, најголемиот број регистрирани лица со дијабет на подрачјето на Битола се токму вработени во Комбинатот.
Во презентацијата, д-р Џулијана Михајловска, ендокринолог при Клиниката „Жан Митрев“, ги опфати основните начела на ова заболување, кое е сè помасовно застапено не само во земјава, туку и во светот. Презентацијата содржеше и конкретни насоки за тоа како да се реагира доколку кај лице со дијабет се појави состојба поврзана со болеста, како и начини тоа лице само да си помогне. Едукацијата беше наменета и за дијабетичари и за останатите вработени – како да препознаат и да помогнат на колега, иако самите не го имаат заболувањето.
Со цел континуирано информирање на засегнатите, од Здружението беше иницирана соработка преку видео туторијали, како модерен и практичен начин на едукација. Така, вработените во РЕК Битола ќе можат навремено да бидат информирани, едуцирани и постојано да ги надградуваат своите знаења во борбата со дијабетот.
Основата на борбата со ова заболување е правилната исхрана, редовната физичка активност, свесноста за сопствената состојба и континуирано надградување на знаењето. Бидејќи секој организам е различен и реагира на поинаков начин, колку подобро човек се самоспознава, толку е помал внесот на потребните инсулински единици.
