Успешно заврши реализацијата на проектот „Ѕирнете во старите касели“, од областа на креативните индустрии, чија основна цел беше ревитализација и афирмација на македонските традиционални ракотворби – везови, плетенини, ткаенини, изработки од мониста и други техники – и нивно вградување во современи креативни изработки.
Во рамките на проектот беа реализирани две обуки на тема „Традиционалните мотиви од минатото во функција на нови современи изработки“, кои ги презентираше проф. Филип Јаковлевски, како и две обуки на тема „Производи и примена на техниката филцање на волна“, спроведени од проф. Анита Стефановска.
Обуките беа проследени со дванаесет практични работилници, реализирани во шест различни техники на изработка на ракотворби: кроење и шиење, вез, изработка на накит, ликовна работилница – печатење, плетење и филцање на волна.
Посебен дел од проектот беше презентацијата на изработените ракотворби на Широк Сокак и пред Културно-информативниот центар – КИЦ Битола, со што традиционалните техники и мотиви беа доближени до пошироката јавност и претставени во современ контекст. Во текот на реализацијата, повеќе од 30 ракотворци имаа можност да ги надградат своите теоретски знаења и практични вештини.
Како особено значаен извор на инспирација беше презентирана стара касела со ракотворби стари и до 150 години, зачувани од едно старо битолско семејство.Овие автентични ракотворби, со своите традиционални мотиви, техники и естетика, послужија како инспирација за младите ученици од средното текстилно училиште, но и за останатите учесници во проектот, поттикнувајќи ги традиционалното знаење и наследство да ги преточат во нови и современи форми.
Преку проектот „Ѕирнете во старите касели“ се направи значаен чекор кон поврзување на традицијата со современата уметност и модната креација. Македонското културно наследство доби нов контекст, а старите техники и мотиви беа претставени како неисцрпен извор за современо творештво.
Проектот „Ѕирнете во старите касели“ беше реализиран од страна на ЗУР „Македонски ракотворби“, во соработка со СОУ „Таки Даскалот“ – текстилна насока, со поддршка од Министерството за култура и туризам.
