Во организација на Федерацијата за училишен спорт на Македонија и СОУ „Мирче Ацев“, вчера во Прилеп се одржа Државното првенство – завршен турнир во ракомет за средни училишта (машка конкуренција).
Во двете полуфинални средби беше прикажана одлична игра, а сосема заслужено пласман во големото финале обезбедија двете најдобри екипи: СОУ „Гимназија Јосип Броз Тито“ – Битола и СОУ „Мирче Ацев“ – Прилеп.
Државен шампион за 2025 година е Гимназијата „Јосип Броз Тито“ од Битола, која во финалето славеше победа со резултат 23:17. Во полуфиналето, битолската екипа беше подобра од СОУ „Гоце Делчев“ – Куманово со убедливи 29:19.
Победничкиот тим, составен од ракометари на Е. Пелистер, беше предводен од професорот Михајло Сиљанов.
Овој успех уште еднаш потврдува дека Битола е расадник на млади и надежни ракометари, што беше потврдено и со неодамнешниот пласман на Ф4 турнирот во Келн во младинската Лига на шампиони.
