Како можат современите технологии, научните истражувања и креативноста на младите да придонесат за развојот на локалната економија? Ова е едно од централните прашања на дводневниот колабораториум (CoLab), што на 12 и 13 ноември го организира Универзитетот „Св. Климент Охридски“ – Битола, во рамките на европската универзитетска алијанса COLOURS.
Под мотото „Вештачка интелигенција, прехранбени системи и зелени технологии за регионален развој“, настанот има за цел да создаде простор за размена на знаења, препознавање на регионалните предизвици и развивање решенија со практична примена.
Колабораториумот обединува претставници од академската заедница, компаниите, институциите и студентите. Во активностите се вклучени Регионалната стопанска комора, Агенцијата за поттикнување на развојот на земјоделството, државни институции, како и студентски тимови од Технолошко-техничкиот факултет – Велес, Факултетот за информатички и комуникациски технологии – Битола и Техничкиот факултет – Битола.
Меѓународниот карактер на настанот го потврдува и учеството на проф. д-р Ивана Мајиќ од Универзитетот во Осиек, Хрватска, како и на Бенгт Фелбе, претставник на Општина Бјув и соработник на Универзитетот Кристијанштад од Шведска.
Соработката како основа за иновации
Една од главните пораки на настанот е дека регионалниот развој бара поинтензивна соработка меѓу образовните институции, бизнис-заедницата, јавниот сектор и граѓанското општество.
На отворањето беше истакнато дека универзитетите имаат значајна улога не само во создавањето знаење, туку и во неговото претворање во конкретни решенија за потребите на општеството.
Проректорот за наука на УКЛО, проф. д-р Горан Илиќ, ја потенцираше посветеноста на Универзитетот кон Целите за одржлив развој на Обединетите нации, нагласувајќи го значењето на моделот на четирикратен хеликс, кој ги поврзува академската заедница, институциите, стопанството и граѓанскиот сектор.
На важноста на дигиталната трансформација и одговорното управување со податоците се осврна проректорката за студентски работи, проф. д-р Светлана Николоска. Таа посочи дека современите дигитални процеси отвораат нови можности, но истовремено бараат внимателен пристап кон безбедноста и заштитата на информациите. Особено ја нагласи потребата студентите активно да се вклучуваат во ваквите иницијативи и да го развиваат својот иновативен потенцијал.
Од аспект на бизнис-заедницата, претседателот на Регионалната стопанска комора на Битола, м-р Мирко Велковски, ја истакна важноста од поврзувањето на стопанството со академските институции. Тој нагласи дека соработката со УКЛО претставува можност научните знаења и истражувања да добијат конкретна економска вредност и да придонесат за зголемување на конкурентноста на компаниите.
Студентските идеи добиваат можност за реализација
Првиот ден од програмата е посветен на мастеркласи и тркалезна маса на тема „Четирикратен хеликс – Регионални потреби и предизвици“, преку кои учесниците ќе ги идентификуваат клучните прашања и можностите за развој на регионот.
Вториот ден фокусот се префрла на студентите и практичната работа. Студентите, поделени во интердисциплинарни тимови, ќе работат на конкретни предизвици, ќе развиваат иновативни предлози и ќе ги презентираат своите решенија пред учесниците и стручната јавност.
Посебен акцент е ставен на можноста најдобрите идеи да добијат поддршка и по завршувањето на настанот. Проф. Елизабета Тошева, раководителка на Работниот пакет 9, во чии рамки се реализира CoLab, најави дека УКЛО планира да објави повик за почетно финансирање (Seed Funding), наменет за понатамошен развој на студентските иновативни решенија.
Според неа, ваквиот модел им овозможува на студентите непосредно да се запознаат со реалните потреби на компаниите, додека бизнис-заедницата добива можност да ги препознае младите таленти и нивните потенцијали.
Со реализацијата на CoLab, УКЛО уште еднаш ја потврдува својата определба за градење посилни партнерства со регионалните чинители и за создавање услови научниот и иновативниот потенцијал да се преточат во конкретни развојни иницијативи.
Вистинската вредност на ваквите средби не е само во размената на идеи, туку и во можноста тие да добијат продолжение, поддршка и практична примена во заедницата.
