Со концерт на светски познатиот Ningbo Symphony Orchestra од Народна Република Кина, синоќа во преполната сала на Центарот за култура во Битола свечено беше отворено 56. издание на Интернационалниот фестивал на народни игри и песни „Илинденски денови“.
Битолската публика имаше ретка можност да проследи настап на оркестар кој редовно гостува на престижни светски сцени. Врвната изведба беше наградена со долги аплаузи, а атмосферата уште еднаш потврди дека Битола знае да препознае и да ја цени високата уметност.
Свеченото отворање го означи почетокот на уште едно фестивалско издание кое и оваа година ќе донесе богата програма со учесници од земјата и странство. Во наредните денови, „Илинденски денови“ ќе бидат место на средба на различни култури, традиции и народни уметности, претворајќи ја Битола во центар на фолклорот и културната размена.
Фестивалот и годинава продолжува да ја негува својата повеќедецениска традиција, поврзувајќи народи и генерации преку музиката, играта и културното наследство.
фотограф | Сашо Ставрев
