Во рамките на проектот „Денови на влашката култура“, што го реализира Здружението за права и хуманост ИНТЕГРА НАУ од Скопје, на 27 септември во Битола ќе се одржи изложбата на стари фотографии „СЛИКИТЕ СВЕДОЧАТ“. Настанот ќе се реализира во Националната и Универзитетска библиотека „Св. Климент Охридски“ со почеток од 17 часот.
На изложбата ќе има фотографии од секојдневието на Власите: Грамостеањ, Фаршироц и Москопољеањ, од нивните различни животни активности: работа со стока, домашни работи, веселби, собири по различни поводи.
Во истата изложба ќе најдат место и фотографии од предмети кои Власите ги користеле во минатото.
На настанот ќе бидат изложени 64 фотографии кои, во најголема мера датираат од почетокот на минатиот век, односно од 1900 до 1940, но има и неколку постари фотографии од крајот на 19 век, а има и некои понови фотографии.
Ќе се изложат и влашки носии од различни краеви на Македонија односно, од источниот дел на земјата: Штип, Св. Николе, Велес, Куманово, а ќе има градски носии и од Битола и Крушево. Вкупно ќе има околу 10 женски, машки и детски носии, а ќе има и простирки и ткаенини кои се користеле за шиење на арари, вреќи, бисаги и торби. Исто така ќе бидат изложени и поделикатни платна кои се користеле за покривање на лебот во периодот на стасување и носење за печење во фурна, како и за чување на испечениот леб.
Како дел од програмата, гостите ќе може да проследат и видео-интервјуа со млади Власи кои зборуваат за значењето и иднината на влашкиот јазик.
Ова е третата од шесте активности во рамките на проектот „Денови на влашката култура“. Претходно во Скопје беа одржани мултикултурна поетска вечер и првата изложба „Сликите сведочат“, а во следниот период активностите продолжуваат во Крушево и Штип, како и со детски културни смотри во Скопје.
Датум и место:
📅 27 септември 2025 (сабота)
📍 Национална и Универзитетска библиотека „Св. Климент Охридски“ – Битола
🕔 Почеток: 17:00 часот
Претседател на ЗПХ ИНТЕГРА НАУ, М-р Јана Михаилова
Потпретседател на ЗПХ ИНТЕГРА НАУ, Марија Николова
