Бигорскиот манастир и оваа година беше духовно и уметничко прибежиште за младите уметници учесници на Мал Битолски Монмартр.
По трет пат по ред, ова свето место ги отвори вратите за младите таленти од целиот свет, кои со четка и боја ги преточија убавините на Бигорската Обител во уметнички дела полни со инспирација и почит.
Како и претходните години, и оваа 2024 година беа создадени импресивни уметнички творби, а дел од нив се веќе трајно врежани во историјата на манастирот. Во трајна сопственост на Бигорскиот манастир беа донирани 33 цртежи од овогодинешниот Монмартр, како дел од благодарноста за несебичната поддршка и соработка со младите ликовни уметници. На игуменот Партениј му беше врачена и посебна Благодарница за неговиот придонес во поттикнувањето на младинската уметност и духовноста.
Меѓу младите таленти кои ја овековечија Бигорската Обител се истакнаа:
- Ајшенур Карадениз од Трабзон, Турција
- Маркета Хејлова од Плзен, Чешка
- Мериам Арнаутска од Софија, Бугарија
- Онур Мете Јузук од Кајсери, Турција
Твореа вкупно 85 деца и 30 професори и асистенти, организирани во 18 делегации од 17 различни држави заедно со домаќините – претставниците на Детското ликовно студио „Свети Кирил и Методиј“ од Битола.
Преку боите и мотивите на Бигорски, младите творци од светот го испратија најубавиот мост на поврзување – оној на уметноста, духовноста и културното разбирање.
