ООУ „Коле Канински“ Битола го одбележа 80-годишниот јубилеј со свечена академија во Офицерскиот дом во Битола.
По повод овој јубилеј им беа доделени признанија и благодарници на најуспешните ученици, наставници како и соработници и помагатели на училиштето.
Директорката на училиштето, Дијана Христовска истакна:
„Целта на овие јубилеи е да се потсетиме на делата на Коле Канински и достојно да го зачуваме неговото име. Ова училиште има богата историја и голем број успешни луѓе излегле од овие клупи. Низ овие 80 години училиштето се соочило со голем број предизвици, но излегло уште посилно“, истакна таа.
На свечената академија присуствуваше и синот на Коле Канински, Стево заедно со своето семејство. Тој рече дека секоја година доаѓа за патронатот, прво со мајка му, а сега со сопругата, ќерката и внукот и се заблагодари што се чува споменот за неговиот татко.
„Училиштето отсекогаш беше прво, се надевам дека и во иднина така и ќе остане“, рече тој.
