10-годишниот Стефан Ѓорѓиевски од Битола, викендов постигна голем успех на BMU Европскиот и Македонски шампионат кој се одржа на Мото крос патеката кај Старо Лагово, Прилеп. Тој го освои првото место во Македонија во категоријата MX65 и петтото место во Европа.
Но, успехот е уште поголем затоа што на младиот и талентиран Стефан ова му беше второ учество на натпреварување. Првото учество му беше минатата година на патеката во Смолево, каде исто така го освои првото место.
Стефан имаше огромна поддршка од своето семејство на натпреварот.
Од семејството за Читај бе велат дека се горди на неговиот успех. Стефан, четвртооделенец во ОУ„Тодор Ангелевски“ Битола, вози мотор од 4 години и од мали нозе ја покажа својата склоност кон овој спорт. Изминатите години редовно и интензивно тренираше на патеките, па затоа успехот сам си дојде. Велат дека викендот се возеше на дожд, врнеше и град, на многу лоши временски услови и каллива патека, но Стефан успеа да извози до крај и да стигне до одличен резултат. Стефан е член на клубот „МК Мотори“ од Скопје.
Патеката во Лагово е долга 1650 метри со минимална ширина од 6 метри и старт од 90 метри и викендов беше домаќин на бројни локални, но и меѓународни натпреварувачи во 7 категории.
