Фановите на дизниевиот филм „Замрзнатото кралство“ (Frozen) се убедени дека живописното австриско село Халштат беше инспирација за фиктивното кралство Арендел во блокбастерот на Дизни. Иако уметничкиот директор на филмот, Мајк Џаимо, изјави дека инспирацијата ја нашол во норвешките пејзажни села, сепак, обожавателите на Елса и Ана се убедени дека го посетил Халштат додека барал локација за филмот и бил воодушевен од глетката како од бајките.
Лоциран на брегот на езерото Халштат, опкружен со високи планини во регионот Салцкамергут, Халштат е популарна туристичка дестинација поради својата неверојатна природна убавина. Има долга историја и некогаш бил просперитетен центар за ископување сол.
Запишан на списокот на светско наследство на УНЕСКО во 1997 година поради куќите во пастелни бои и културниот пејзаж, познато е дека овде бил сместен важен локалитет од железното време што датира од 7 век п.н.е.
Деновиве тоа е мирно место каде времето како да застанува.
Лесно е да се види зошто Халштат би бил совршена инспирација за Арендел. Ова место има бајковит изглед со антички куќи и улици со калдрма. Тука се најубавите пејзажи во Австрија.
Иако се чини дека Халштат никогаш не бил потврден како инспирација за Арендел, тоа не ги спречило безброј фанови на Фрозен да го посетуваат. Ова село со околу 800 жители, имало и до 10.000 посетители дневно.
