Во Големата сала на Центарот за култура во Битола, на 6 ноември се одржа 25-тото јубилејно издание на детскиот музички фестивал „Тра ла ла“.
Во оваа свечена вечер настапија 13 нови ѕвездички, кои изведоа новосоздадени детски песни од познати македонски автори – Кристијан Габроски, Ристо Самарџиев, Крсте Симоновски и други.
Гала-претставата беше вистинско уживање за сите љубители на детската песна, музиката и културата. Поздравна беседа одржа Митрополитот Преспанско-Пелагониски г. Петар, а на присутните им се обратија и градоначалникот на Општина Битола, г-дин Тони Коњановски, како и директорот на фестивалот, Тони Алексовски.
Фестивалските композиции беа збогатени со кореографии во изведба на балетски и танцови групи, кои ја внесоа магијата и шаренилото на сцената.
Со ова издание, „Тра ла ла“ го прослави својот 25-ти роденден – четврт век посветен на развојот на детската песна и поттикнување на музичката култура кај најмладите.
🎵 Среќен роденден, „Тра ла ла“!
Со желба за уште многу години исполнети со песна, насмевки и детска радост!
