Културниот и информативен центар – Битола се вклучува во кампањата за промоција на премиерата на театарската претстава Црно семе, во продукција на НУ Народен театар – Битола.
По тој повод, на 14 и 15 април, со почеток во 19 часот, во киното „Браќа Манаки“ во Битола, ќе биде проектиран култниот македонски филм Црно семе, изработен според сценарио на Ташко Георгиевски и Кирил Ценевски.
Битола живее со животните приказни на Доне, Христо, Парис, Марко – со тешката судбина на Македонците од Егејска Македонија.
Дејството на филмот е сместено за време на Граѓанската војна во Грција (1946), кога припадници на кралската грчка војска, меѓу кои и Македонци од Егејска Македонија, под обвинение дека се комунисти и непријатели на кралска Грција, биле испраќани во логор на пуст остров.
Поради своите убедувања и етничкото потекло, дел од нив ги надминуваат сите тешкотии, задржувајќи го човечкото достоинство. Други, пак, не успеваат – и наместо спас, доживуваат морален пад.
Од бројните домашни и меѓународни награди за филмот, најзначајна е Златната арена во Пула.
Иако музиката за филмот ја компонирал Илија Пејовски, во финалната верзија на филмот таа не е вклучена.
Првично, на одјавната шпица требало да оди песната Со маки сум се родила, но на затворена проекција пред премиерата, режисерот Ценевски, забележувајќи дека некој од публиката се расплакал, децидно побарал музиката да се отстрани.
„Не сакам да се плаче на мојот филм“, изјавил тој.
Така, Црно семе останува без музичка подлога – во него „музиката ја создаваат птиците, брановите и тишината“.
Филмот е снимен во 1971 година, а во 2019 година Кинотеката на Македонија ги прикажа четирите долгометражни играни филмови на режисерот Кирил Ценевски, дигитално реставрирани и објавени во ДВД-комплет.
Ценевски беше и првиот добитник на наградата Големата ѕвезда на македонскиот филм, што ја доделува Друштвото на филмските работници на Интернационалниот фестивал на филмската камера „Браќа Манаки“ во Битола.
Во филмот играат: Дарко Дамески, Ацо Јовановски, Ристо Шишков, Мите Грозданов, Ненад Милосављевиќ, Воја Мириќ, Павле Вуисиќ и Вукан Диневски.
Влезот во киното „Браќа Манаки“ е бесплатен.
Премиерата на театарската претстава Црно семе во Битолскиот театар е закажана за 16 април – и истата е целосно распродадена.
