За првпат, четвртоноемвриската програма организирана од општина Битола, по повод Денот на ослободувањето на градот, вклучува интересни содржини за најмладите. Дел од детската програма, е и претставата „Некој нека ми каже колку сум важен“, која актерите од Театарот за деца и младинци, ќе ја одиграат на „Нова сцена“, во Центар за култура, на 01.11, со почеток од 19.00 часот. Интересот за претставата е голем, а преостанатите бесплатни влезници, можат да се подигнат од Офицерскиот дом, денес до 19.00 часот и понеделник од 08.00 до 19.00. Претставата е во времетраење од 70 минути и е наменета за деца над 6 годишна возраст.
„Некој нека ми каже колку сум важен“ е работена според приказната ,,Курт Кво Вадис” на Ерланд Лу, познатиот норвешки, современ писател, кој напишал серијал книги за деца во кои главен јунак е возачот на вилушкар, Курт.
Во оваа приказна, Курт, поради високите општествени кругови во кои се движи, станал несигурен во себе и со својот мал син тргнува по потрага на своето големо дело што ќе му помогне и тој да стане важен во своето опкружување.
Драматургот, Милена Деполо, за претставата вели:
„Додека ја правевме оваа претстава не сакавме да бидеме како некои „паметни големи луѓе” кои ќе ги научат нешто децата. Инаку, децата се многу често многу попаметни и од нас, баш како Бад, кој има само неколку годинки, а е попаметен и од својот татко. Сакавме на децата да им раскажеме приказна и со нив да ги споделиме мислите, грижите и чувствата кои растеа во нас додека се дружевме со Ерленд Лу и неговиот главен јунак Курт.
· Нормално е во исто време да бидеш обичен и необичен.
· Нормално е зад себе да оставиш некакви траги кои се добри, ама и некои кои не се толку добри.
· Не мораме да бидеме светски шампиони за да не сака некој.
· Ќе направиме некоја навистина битна работа, ако за неа не очекуваме аплаузи. Ако ја правиме само затоа што ни е навистина важна, а не за да ги вчудоневидиме другите“, истакнува Деполо.
