Постојат пет години, а сигурни сме дека нема битолчанец/ка кој не слушнал за нив. Некогаш три чупиња во бендот, а сега познати како Чупињата и Марио. Што би рекле битолчани, битолско име со тапија! Музиката им е прва љубов на тројцата, иако само Марио е професионален музичар. Дона е дипломиран правник, а Андреја дипломиран економист. Битолчани се секогаш расположени за добра забава, а секоја свирка си е приказна за себе. Малку за бендот, свирките, приемот кај публиката, песните кои ги свират, разговаравме со вокалот – Дона Петрова.
Читај бе: Најнапред кажете ни нешто повеќе за самата група, колку време постои, чија беше идејата…
Дона: Групата неодамна наполни 5 години постоење, а на самиот почеток беше формирана од три чупиња (по битолски), поради што непосредно бендот го доби и своето име. Како три другарки и колешки во градскиот хор ,,Стив Наумов’’ Битола, ја користевме секоја прилика кога ќе бидеме заедно да испееме по некоја песна. Андреја беше секогаш расположена за свирење на гитара и за пеење, а јас и Емилија ја поддржувавме со по некоја терца. Со текот на времето, голем број пријатели кои беа во наше друштво и не слушаа, ја начнаа идејата за формирање на бенд. Така започнавме да настапуваме во локалите на наши пријатели, кои први ни го дадоа најголемиот ветер во грбот. Потоа, кога добивме поддршка од битолската публика, настапите станаа сè почести и можам да кажам дека во Битола нема локал каде немаме настапувано.
Читај бе: Кои се членовите на Чупињата и Марио? Едно кратко био за вас…како сите сте поврзани со музиката…
Дона: Како што споменав и погоре, во бендот членувавме три чупиња, но поради одредени околности, бендот претрпе промени, за денес во него да членуваме јас, Дона Петрова како вокал, Андреја Чукалкова вокал и гитара и Марио Субашевски на кахон. Иако прва љубов на тројцата ни е музиката, сепак само Марио е професинален музичар кој е апсолвент на Факултетот за музичка уметност во Штип, додека јас сум дипломиран правник, а Андреја е дипломиран економист. Па поради тоа што и тројцата сме вработени на различни места, секогаш со нетрпение го очекуваме викендот кога публиката, но и ние самите ќе се почестиме и ќе уживаме со добра песна.
Читај бе: Каде сè сте настапувале изминатите години?
Дона: Најчесто настапуваме пред нашата битолска публика, меѓутоа се дружиме и со публиката во Охрид, Прилеп, Штип, Кичево итн. Често настапуваме и на приватни забави, матури, крштевки и свадбени прослави. Имаме понуди од голем број градови низ државата, па во иднина се надеваме дека ќе успееме да ги реализираме сите настапи кои ни се предвидени и договорени.
Читај бе: Каков е приемот кај битолската публика? Навикнати ли се на клубски свирки?
Дона: Битолчани се секогаш расположени за добра забава. Енергијата која ја испраќаат битолчани ни го дава најголемиот поттик да работиме и понатаму, затоа што сепак, за еден музичар најголемата награда е искрениот аплауз кој ќе го добие по завршување на свирката.
Читај бе: Каков е Вашиот репертоар? Што е она што битолчани најмногу сакаат да го слушаат?
Дона: Тоа најмногу зависи од приликите, па така нашиот репертоар е разнолик и во него може да се најдат од англиски и македонски песни, до најпосакуваните т.н. екс-ју хитови и по некоја шпанска и италијанска песна. Но, морам да кажам дека повеќе од половина репертоар е составен благодарение на предлозите кои ги добиваме од публиката.
Читај бе: Кажете ни една интересна случка на која секогаш ќе се потсетувате…
Дона: Случки интересни за паметење ги имаме безброј и секоја на свој начин посебна за нас. На секој настап се случува некој миг кој долго ќе се памети. Благодарение на настапувањата имавме привилегија да запознаеме огромен број луѓе низ целата држава, кои подоцна ни стануваат добри пријатели. Искрено, не би можела да издвојам интересна случка, затоа што секоја свирка си е приказна за себе.
Читај бе: И на крај, една порака до битолчани…
Дона: Музичарите најмногу ја чувствуваат енергијата на публиката, затоа што тоа е нештото кое нè храни и ни дава сила и мотив за да опстојуваме и да се надоградуваме. Нашите битолчани се лидери во ширење позитивна енергија и само посакувам да останат како такви и да се дружиме уште многу години заедно.
И за на крај, едно музичко уживање за Вашите уши од Чупињата и Марио.
Error: Contact form not found.
