При крајот на 52. издание на фестивалот „Илинденски денови“ поразговаравме со Димче Миновски, еден од првите водители на фестивалот кој на сцената во таа функција беше скоро 20 години. Димче, кој денеска, на 29 јули наполна 80 години, ни раскажа за почетоците, ни покажа голем број благодарници, фотографии..сподели со нас и неколку сеќавања.
„Бев многу млад, но останале некои спомени. Како се роди идејата за илинденските денови? Сето се случуваше во културно просветната заедница – КПЗ, која беше столбот на сите културни манифестации. Се собиравме таму, јас по новинарска обврска постојано бев таму присутен. Почна да се размислува дали на Битола и е потребна една поголема маннифестација. Мислам дека идејата ја даде Илија Алушевски, вљубеник во фолклорот. Имаше и спротивставени мислења, дека не и е потребен таков фестивал на Битола. Повеќе сакаа нешто како серенадата, забавната, класичната музика…Но, на крај се одлучи да се создадат „Илинденските денови“. Јас бев млад новинар, ги следев активностите на КПЗ, не бев член на Управниот Одбор, но се вклучив во таа група која ги создаде „Илинденските денови“, ни раскажа Димче.
Тој вели дека на почетоците, исклучиво се бараше да се почитува изворниот фолклор, а стручни лица од фестивалот одеа по местата од каде беа пријавени групите.
„Неколку Илинденски денови се одржуваа на терасата во Домот на армијата, а потоа се префрлија на ракометното игралиште. Сега гледам има малку народ, а порано идеа иселениците да гледаат, со невидена љубов ги следеа, затоа имаше по 7-8000 гледачи, народот го сакаше фолклорот и уживаше. Кога се пренесе во ракометното игралиште имаше невидено голем интерес, многу наши сонародници од прекуокеанските земји ги темпераа своите посети за да бидат тука за време на Илинденските денови. Со љубов се гледаше, со деца, доаѓаа цели семејства, немаше игла каде да се фрли, а и од селата доаѓаа цели семејства да ги гледаат групите. „Илинденски денови“ остаа белег на градот, извор на многу податоци, како се негувал фолклорот. Се радувам што постојат. Очекувам и се надевам дека Илинденските денови ќе продолжат“, вели Димче и дополнува дека благодарение на овој фестивал, стекнале голем број пријателска, но и дека голем број културно уметнички друштва биле формирани благодарение на фестивалот, за да може да учествуваат на него.