Водени од идејата за што посвечено и величествено одбележување по повод 4-ти Ноември, денот на ослободувањето на Битола, Здружението на пијанисти и музички педагози ПИЈАНО Битола, чии основачи се Марија Шамоска Буџаковски и Јана Четелева Белевска во соработка со Државното музичко училиште и КИЦ Битола, на 5 ноември организираше Музички маратон насловен „СО ЉУБОВ ЗА БИТОЛА“.
„Со моќта на музиката, со маратонот – кој е симбол за упорност и издржливост, музичкото училиште кое е еден од брендовите на нашиот град и кое што оваа година одбележува 75 години од своето постоење, и со здружението ПИЈАНО кое постои за Битола и јасно го глорифицира епитетот „Битола, градот на клавирите“, ние сметаме дека во просториите на КИЦ Битола се одржа настан кој долго ќе се памети, а битолчани имаа можност за едно целодневно културно уживање. Овој настан започна во 12 часот со претставување на изведби на млади музички таленти од музичкото училиште, на сите инструменти кои што се изучуваат во училиштето : пијано, виолина,гитара, соло пеење, труба, кларинет, флејта, ударни инструменти, саксофон и.т.н.“, велат организаторите.
Учениците изведуваа дела од различни класични композитори во времетраење од 6 часа и со тоа покажаа зошто ова училиште има толку долга традиција и потврден квалитет. Изведувачите беа поделени во 3 блока на изведби со паузи од половина час помеѓу.
