Од 12 до 15 август во Турку, Финска се одржа грандиозниот саем на науката “Science on Stage Festival 2024” . На овој настан, кој се одржува на секои 2 години, од Македонија за прв пат учествуваa тројца претставници, предводени од координаторката Феџиде Адеми. Импресиите од овој настан и од Финска ни ги пренесе Валентина Степановска Андонова, наставник во ОУ „Даме Груев“ Битола.
„Тие 4 дена ние бевме едно големо семејство составено од околу 450 учесници од 35 држави во Европа, секој од нас, настојувајќи што е можно подобро и поуспешно да ја претстави својата земја. „Вие сте амбасадори на своите земји и сите сте победници“ – тоа беше едноставна, но моќна реченица искажана од страна на организаторите на “Science on Stage Festival 2024”, која ни даваше дополнителна инспирација.
Всушност, ние како учесници и претставници од своите земји не дојдовме по случаен избор. Конкретно, во Македонија во ноември, 2023 година во Тетово во организација на Stemlab и Science on Stage North Macedonia беше спроведен национален натпревар помеѓу наставници, креатори на иновативни проекти од областа на СТЕМ предметите“, вели таа.
Најважниот момент во сите 4 дена беше претставувањето на сопствените проекти пред колегите од Европа под мотото „За наставници од наставници“ и пред сите посетители, кои во огромен број беа присутни на саемот.
„Навраќајќи се на моментите поминати на интернационалниот саем за наука, можам да кажам дека деновите се топеа како минути исполнети со интересни работилници, пленарни сесии, предавања, ставајќи акцент на начинот на имплементација на вештачката интелегенција, посебно во СТЕМ предметите. Најважниот момент беше претставувањето на нашите проекти. А во слободното време ја истражувавме магијата на градот Турку.
За време на самиот настан голем впечаток ми остави и “Science on Stage Choir” , во кој учествувавме 30-тина вљубеници на кои музиката ни е хоби, а со тоа и направивме да заживее спојот наука+музика за да додаде релаксирачка нота и еуфорија на самиот настан.
За импресиите од овој саем можам премногу да пишувам, но ќе кажам кратко дека тие се едноставно прекрасни, бидејќи навистина имаше што да се научи. Пред сè, меѓусебно запознавање на мотивираните наставници ширум Европа, односно нивните интересни и применливи проекти. За мене, едно позитивно искуство засновано на дружење, разменување на идеи, учење на нови култури и менталитет, раскажува Валентина и на крајот го коментира нејзиното видување за Финска како земја:
„За крај, фасцинирана сум од смирението, неверојатно добрата организираност, високото ниво на почит кон својата земја и животната средина, како и енормното ниво на култура кај финскиот народ. Па, нам ни преостанува да ја негуваме и вреднуваме среќата што ја почувствувавме од најсреќната земја во светот“.
