Голем успех за македонскиот фолклор и за Битола – КУД „Илинден“ од Битола освои второ место и парична награда од 3.000 американски долари во категоријата автентичен фолклор на Светскиот натпревар „World Folk Dance Competition“ кој се одржа во Истанбул.
Битолските фолклористи се претставија со ороводната песна „Седело Ѓуре“, орото „Машка копачка“ и сценската адаптација „Русински мегдан“ на м-р Љупка Стефановска, со што оставија силен впечаток кај стручното жири и публиката.
На натпреварот учествуваа 41 фолклорна група од повеќе земји, од кои 21 се натпреваруваа во категоријата автентичен фолклор, а 20 во категоријата стилизиран фолклор.
Во силна меѓународна конкуренција, првото место во категоријата автентичен фолклор го освои Република Башкортостан (Русија), второто место му припадна на КУД „Илинден“ – Битола, додека третото место го освои Црна Гора.
Овој значаен успех е уште една потврда за квалитетот и посветеноста на членовите на КУД „Илинден“ – Битола, како и за вредноста на македонската народна песна, игра и традиција кои продолжуваат достоинствено да се претставуваат на светската сцена.
