Книжарницата Book’s House на 17 декември ќе го прослави првиот роденден. Саботното битолско пладне ќе биде исполнето со богата програма и голема дружба со повеќе македонски автори, поканети се сите, има посебно изненадување за најмладите читатели.
Книжарницата е сместена во старата битолска општинска зграда, архитектонски располага со рустикален и раскошен изглед кој е дополнително збогатен со истородни детали од семејството Делеви, сопствениците на книжарницата.
Во текот на изминатава година книжарницата ја имаат посетено голем број љубители на книжевноста, писатели, поети, случајни минувачи, се имаат промовирано десетина книги од македонски автори.
Ако нешто очајно му недостигаше на градот Битола, тогаш тоа е токму оваа книжарница, која веќе една година го разбива митот за продавница за книги и има неколку поводи за тоа.
Уште од првото влегување во книжевниот простор сте опсипани со високи вибрации на гостопримливост, почит, многу често се случува при повторните посети читателите да речат дека се чувствуваат како дома, убаво и удобно.
Јулијана Делев е современа книжарка која умее во право време да ја понуди вистинската книга кај читателот. Иако таа е бескрајно скромна, но нејзината љубезност има најголемо влијание кон читателите и нејзината будност. Таа постојано е во тек со книжевните новини во Македонија и странство, така што скоро и да не се случува да пропушти ново книжевно издание.
Најголемата поддршка во работата во книжарницата, Јуле ја има од нејзиниот сопруг, кој е извонреден познавач на книжевноста и страстен читател.
Ако ги запрашате зошто се одлучија да отворат книжарница среде пандемиски колапс, кога бизнисите беа на стаклени нозе, ќе ви одговорат дека станува збор само за претворање на нивното хоби во работно место.
Во книжарницата Book’s House можат да се најдат изданија скоро од сите македонски издавачки куќи, им се посветува големо внимание на самостојните издавачи, книжарницата располага и со полици со литература на англиски јазик – дела на класиците и современи автори. Во секое време се прават нарачки и резервации на книги.
Најпозитивно е што во Book’s House прво се промовираат македонските автори и нивните дела и секогаш се на централно место.
Книжарницата Book’s House се развива од идеја за развој на самостојно претприемништво, бизнис – план помогнат со грант од Владата на Република Македонија.
Но, за битолчани оваа книжарница е оживување на културниот предикат на градот, ако се земе предвид дека некогаш во Битола беше центарот на книжевната идејна и развојна мисла, во издавачка, трговска и креативна смисла.
Секој добронамерник е поканет на прославата на првиот роденден на Book’s House – читањето е ретро навика која никогаш не излегува од мода. Во Битола е кул да си модерен и начитан – дефиниција за градско дете.
Error: Contact form not found.
