Младиот ракометар од Битола, Мартин Бучуковски со брзина, визија и огромна решителност ги освојува спортските терени. Неговата приказна започнува спонтано, но целите се јасни и високи – македонската репрезентација и Лигата на Шампиони. Во ова интервју открива што го мотивира да продолжи, кои се неговите идоли и кој е најдрагоцениот совет што го добил.
Читај бе: Како започна твојата ракометна приказна? Што те привлече кон овој спорт?
Мартин: Мојата ракометна приказна започна случајно. Мојот постар брат тренираше ракомет и така спонтано започнав и јас. Ме привлече тоа што ракометот е брз и динамичен спорт, тимски, а не индивидуален.
Читај бе: Кажи ни нешто повеќе за твојот клуб и твојата позиција на теренот.
Мартин: Играм во клубот Македонија Ѓорче Петров веќе една сезона. Клубот работи со млади играчи и вложува во нив, што се забележува – моментално сме први во групата Б.
Читај бе: Како би го опишал твојот стил на игра и твоите предности?
Мартин: Мојот стил е брза транзиција и динамичен ракомет. Најголемата предност ми е брзината, експлозивноста, промената на правец и визијата на играта.
Читај бе: Која е твојата најголема цел во кариерата?
Мартин: Да заиграм за Македонската репрезентација и да настапам во Лигата на Шампиони.
Читај бе: Што те мотивира да продолжиш со напорни тренинзи и натпревари?
Мартин: Желбата за успех и постигнување на моите цели.
Читај бе: Кои се твоите идоли во ракометот и зошто ти се инспиративни?
Мартин: Како идол го издвојувам Сандер Сагосен, поради неговата визија на игра.
Читај бе: Каков е тимскиот дух во твојот клуб?
Мартин: Тимскиот дух е на високо ниво, како на теренот, така и надвор од него. Заедничката атмосфера е важна за добра комуникација на теренот.
Читај бе: Кој е најдрагоцениот совет што си го добил во кариерата?
Мартин: Никогаш не се откажувај, успехот ќе си дојде со труд и работа.
Читај бе: Како гледаш на иднината на ракометот за младите во нашата земја? Што треба да се подобри?
Мартин: Мислам дека ракометот кај младите има светла иднина, но треба да се подобри начинот на работа и функционирањето.
Читај бе: Што би им препорачал на младите кои сакаат да станат професионални ракометари?
Мартин: Колку и да биде тешко, никогаш да не се откажуваат од својот сон, да работат напорно – успехот ќе си дојде со труд.
