На 17 јуни во Битола ќе се одржи првата ноќна женска трка под мотото „Биди своја“. Линк за пријавување
Спортското здружение „Бори се за целта” кое е организатор на трката, ги поканува и охрабрува сите ЖЕНИ, МАЈКИ, ДАМИ и ДЕВОЈКИ да земат учество во ноќната трка од 5К и да доминираат низ битолските улици.
Со цел да се запознаеме подобро со трката, поразговаравме со жената која стои зад оваа идеја – Маја Атанасовска.
Читај бе: Маја, најнапред кажи ни нешто за себе и како дојде до идејата за организирање на женска трка во Битола? Зошто токму женска трка?
Здраво, прво сакам да Ве поздравам Вас и Вашите читатели. Драго ми е што токму баш вашиот магазин ќе не поддржува и следи во проектот. Идејата е токму тоа, ставањето акцент на женската популација, со цел да им се даде поддршка и значење на тоа колку се битни во општеството, и колку значи постоењето како жени и мајки пред сé!
Читај бе: Она што навистина интригира е самото име – Биди своја. Зошто ова име, кое е значењето на овој слоган?
Знаете како, кога ќе си поставите цел во животот вие имате за што да се борите, знаете дека сте живи, дека постоите и целите кон таа цел за да успеете. Истото е и со самата трка, имате цел да истрчате неколку километри и она што е битно е да стигнете до таа цел, без разлика на исходот дали ќе успеете временски да постигнете резултат или не, но сепак битно е да се борите. На крајот од денот вие сте победници со самото тоа што сте земале учество!
Читај бе: Кажи ни нешто повеќе за трката, кога ќе се одржи, од каде ќе биде стартот, а каде целта, на колку километри ќе се трча…
Трката ќе биде ноќна на 5км и ќе се одржува во сабота на 17 јуни со почеток во 20 часот. Пред стартот ќе имаме мало загревање (детали не откривам) (smiley) и секако по финишот на трката, ќе има коктел забава каде натпреварувачите ќе имаат можност за мала дружба.
Читај бе: Кој сé може да се пријави на оваа трка, ќе има ли критериуми за пријава?
На трката можат да се пријават сите оние кои се припаднички на понежниот пол, но и едно мало изненадување на мое огромно задоволство, учество ќе земат деца како и децата со попреченост.
Читај бе: Како оди пријавувањето, што треба да направат? Од денес е достапен и линкот за пријавување…
На нашите платформи фб и инстаграм, ќе го најдат линкот за регистрација, каде што секој заинтересиран може да се најави и секако за да земе учество потребна е котизација.
Читај бе: Која е целта на трката, пораката која треба да се прати?
Како што спомнав и претходно, без разлика на тоа каков и да биде исходот, секогаш борете се за целта, трчајте како теренот да е само ваш!! (smiley)
Читај бе: Кои се твоите сознанија за постоење женски трки во земјава и поширокиот регион?
Според сознанијата кои што ги имам јас, мислам дека само во Скопје се одржува трка за жени, но еве сега и кај нас во Битола, за која се надевам дека ќе прерасне во традиција!!
Читај бе: Кажи ни нешто за себе, чест учесник си на трките во Македонија и надвор. Кога започна да трчаш, каде сé имаш учествувано…
Па, да бидам искрена сум земала учество на многу трки низ државата, неодамна бев на ноќна трка која се одруваше во Солун, и можам да кажам дека секаде искуството е ново.
Читај бе: Што ти помага да ја одржуваш физичката кондиција на највисоко ниво и да постигнуваш одлични резултати?
Тука ја користам приликата да си ги поздравам моите од Фит Концепт, тоа е еден нов концепт на тренинзи во кој што се вклучени пилатес, аеробик и HIIT вежби во интервали со висок интезитет. Од неодамна јас сум дел од тимот како тренер во тој концепт и можам да кажам дека максимално се пронајдов и тука е моментот каде што јас ја добивам мојата енергија и физичка кондиција.
Читај бе: За на крај, една твоја порака до сите оние кои се двоумат дали да бидат дел од „Биди своја“…
Не се двоумете, бидејќи сепак станува збор за дружење, забава и нови искуства, нови почетоци, а можеби и откривање на поле за кое што не сте знаеле, а тоа е трчањето!!
