Во светот на ракометот, каде што дисциплината, упорноста и страста се неопходни за успех, запознаваме еден млад и талентиран играч кој го следи својот сон да стане дел од македонската репрезентација. Со голема поддршка од семејството, овој млад 17-годишен битолчанец секојдневно вложува напор и љубов кон играта. Правејќи ги своите ракометни почетоци во РК Еурофарм Пелистер од Битола, Димитар моментално игра за екипата на РК „Аеродром“ од Скопје. Прочитајте повеќе за неговото искуство, целите и мотивацијата кои го водат кон врвот.
Читај бе: Кога и како започна твојата љубов кон ракометот?
Димитар: Мојата љубов кон ракометот започна на седумгодишна возраст. Ги гледав македонските ракометари на телевизија и секој натпревар ми будеше желба и јас да станам дел од нешто толку големо. Тогаш знаев дека ракометот ќе биде важен дел од мојот живот.
Читај бе: Кој е твојот најголем мотиватор или инспирација во спортот?
Димитар: Најголемата инспирација ми е Sander Sagosen, норвешкиот репрезентативец. Неговата игра, посветеност и страст на теренот ме мотивираат секој ден.
Читај бе: Кои се твоите најголеми достигнувања досега?
Димитар: Еден од најголемите моменти во мојата досегашна кариера беше дебито за првиот тим на РК Аеродром. Чувството да го облечам дресот и да го претставувам клубот е непроценливо.
Читај бе: Како изгледа еден типичен ден на тренинг за тебе?
Димитар: Секој тренинг ми е можност за напредок. Влегувам со целосна концентрација и секогаш се обидувам да дадам повеќе од претходниот пат.
Читај бе: Дали имаш посебен ритуал пред натпревар?
Димитар: Да, слушам музика и се обидувам да се изолирам од социјалните мрежи. На тој начин ја одржувам фокусираноста и ја чувам енергијата за натпреварот.
Читај бе: Што најмногу ти се допаѓа во тимската игра?
Димитар: Најубавото кај тимската игра е поддршката што ја имаме еден за друг, без разлика дали сме во предност или не. Секогаш сме како едно.
Читај бе: Како се справуваш со притисокот за време на натпреварите?
Димитар: За време на натпреварот се обидувам да бидам фокусиран на играта и да ги заборавам сите негативни мисли или направени грешки. Фокусот е клучен за победа.
Читај бе: Која е твојата најголема цел во кариерата како ракометар?
Димитар: Мојот најголем сон е да станам дел од сениорската репрезентација на Македонија. Тоа е мотивација која ме турка напред секој ден.
Читај бе: Кој совет би им го дал на младите што сакаат да почнат со ракомет?
Димитар: Да пронајдат клуб и тренер кои вистински ќе ги научат основите и ќе им помогнат да се развиваат. Посветеноста е важна, но поддршката и учењето од добар тренер се клучни.
Читај бе: Каква е поддршката што ја добиваш од твоето семејство и пријателите?
Димитар: Семејството и пријателите ми се најголемите поддржувачи. Тие се секогаш до мене и ме бодрат на секој чекор, што ми значи многу.
Читај бе: Како го балансираш училиштето и тренинзите?
Димитар: Учам во спортско училиште, што многу ми помага да ги балансирам обврските и времето меѓу училиштето и тренинзите.
Читај бе: Кој ти е идол во ракометот?
Димитар: Sander Sagosen. Го гледам како пример за тоа како еден играч треба да се посвети на спортот и тимот.
Читај бе: Што значи за тебе да го носиш дресот на твојот тим, РК Аеродром и која е твојата позиција на теренот?
Димитар: Дресот што го носам е симбол на тимот и на сите кои веруваат во мене. Играм како среден и лев бек и секогаш се трудам да го дадам најдоброто од себе.
Читај бе: Какви совети ти даваат тренерите и како влијаат на твојот развој?
Димитар: Тренерите ми даваат вредни совети кои ми помагаат да се развивам како играч и како личност. Атмосферата во клубот е одлична и тоа многу влијае на хемијата со соиграчите.
Фотографиите се преземени од РК Аеродром
