Претставата „Црно семе“ во продукција на Битолскиот народен театар, базирана на романот на Ташко Георгиевски, во режија на Андреј Цветановски, ќе биде изведена во рамки на официјалната програма на 59. издание на Македонскиот театарски фестивал „Војдан Чернодрински“ во Прилеп. Изведбата е закажана за сабота, 7 јуни, со почеток во 19 часот.
Сценската адаптација на култниот роман, која ја потпишува Јелена Цветановска, се фокусира на трагичната судбина на Македонците од егејскиот дел на Македонија затворени на пуст остров во Егејското Море. Режисерот Цветановски преку визуелно силна и емоционално суптилна поставка успева да ја оживее драмата, истакнувајќи ја човечката интимност во судир со политичките превирања.
Актерската екипа, составена од Мартин Мирчевски, Огнен Дранговски, Васко Мавровски, Никола Стефанов, Никола Пројчевски, Петар Горко, Борче Ѓаковски, Александар Стефановски, Александар Димитровски, Александар Копања, Марија Цветановска, Петар Спировски, Живко Борисовски и Хари Михајловски, внесува автентичност и длабочина во секој лик. Во претставата учествуваат и четворица млади членови на КУД „Илинден“: Давид Балтовски, Филип Стефановски, Виктор Крстевски и Александар Ѓорѓиовски.
Креативниот тим го сочинуваат: Сергеј Светозарев (сценографија), Благој Мицевски (костимографија), Димитар Андоновски (музика), и Дамјан Цветановски (кореографија). Освен оригиналната музика, во претставата се користи и песната „Бело море“ од групата Мизар, како и композиција од хорот „Хармосини“.
Фестивалот „Војдан Чернодрински“ оваа година го отвора претставата „12“ во режија на Синиша Евтимов, продукција на Македонскиот народен театар од Скопје, а ќе биде затворен на 13 јуни со претставата „Вистината 2“ на Театар Комедија. Во рамки на фестивалот, наградата за животно дело ќе ѝ биде доделена на доајенката на македонскиот и битолски театар, Соња Михајлова.
