Од 14 до 24 јули Битола повторно ќе биде домаќин на меѓународниот камп за традиционална музика „Етно Македонија“, кој годинава се одржува по шести пат во организација на Музичката младина на Македонија. Кампот и оваа година ќе го претвори градот во место на музичка размена, креативност и меѓукултурен дијалог.
Во текот на десетте дена, млади музичари од Македонија, Србија, Босна и Херцеговина, Холандија, Турција, Белгија, Португалија, Шведска и Шпанија ќе работат заедно, учејќи традиционална музика едни од други по слух, според препознатливата Ethno методологија.
Годинашни уметнички ментори се Ангел Спироски (Македонија) и Џули Граехн (Данска), која минатата година беше учесничка на „Етно Македонија“. По успешното завршување на меѓународната обука за Ethno уметнички ментори, оваа година таа се враќа во Битола во нова улога – како ментор. Координатор на проектот „Етно Македонија“ 2026 е Верица Ајтовска.
Во текот на кампот, учесниците заеднички ќе создадат концертна програма составена од традиционални мелодии од сите земји учеснички. Иако најголем дел од нив никогаш претходно не се сретнале, за само неколку дена ќе подготват заеднички концерт кој ќе биде изведен на 23 јули, во рамките на фестивалот „Илинденски денови“.
Публиката ќе има можност да ужива во уникатен музички спој на традиции од различни делови на светот, создаден токму во Битола – град кој и ова лето ќе биде место каде музиката ги поврзува културите и луѓето.
