Градскиот совет на Амстердам одлучи да го забрани пушењето марихуана во познатиот кварт Де Вален, попознат како квартот на „Црвените фенери“, а новиот закон ќе стапи на сила во средината на мај.
Надлежните во градот воведуваат и други ограничувања поврзани со ноќниот живот, а целта е да се подобрат условите за живот на граѓаните кои долго време се жалат на однесувањето на туристите. Според новиот закон, рестораните и баровите во квартот на „Црвените фенери“ ќе можат да работат до два часот по полноќ во петок и сабота.
Новите посетители нема да можат да влезат во Де Вален по еден по полноќ, а сексуалните работници ќе можат да ги даваат своите услуги само до три часот по полноќ. Заедно со новите закони, Амстердам напролет ќе започне специјална кампања наменета за туристите, кои во главниот град на Холандија доаѓаат поради дрога, алкохол и секс.
