Успешно заврши јубилејното 45. издание на „Мал битолски Монмартр“, една од најзначајните и најдолговечни светски манифестации за детско ликовно творештво.
Во изминатите денови, Битола повторно беше центар на детската креативност, талент и пријателство, собирајќи млади уметници од различни делови на светот кои преку своите дела ја овековечија убавината на староградската архитектура и културното наследство на Македонија.
На свеченото затворање за најдобар ученик беше прогласена Лена Павковиќ од ликовното ателје „Артино“ од Србија, додека признанието за најдобро училиште му припадна на „Симпли Арт“ од Хонг Конг, предводено од професорите Хенри Лау и Ирис Ли.
Годинава, на 44. Светска детска ликовна изложба по конкурсот „Битола“ пристигнаа 850 пратки од 85 земји од светот, со повеќе од 85.000 детски цртежи, потврдувајќи го меѓународниот углед и значење на оваа уникатна манифестација.
Во текот на колонијата, над 110 учесници и нивните професори, ментори и родители создаваа, дружеа и разменуваа искуства, оставајќи уште едно незаборавно поглавје во богатата историја на „Мал битолски Монмартр“.
Фото: Саше Богоевски
Детското ликовно студио „Свети Кирил и Методиј“ – Битола, кое речиси шест децении посветено работи на афирмација на детското ликовно творештво, уште еднаш покажа дека уметноста нема граници, а детската имагинација е најсилниот мост што ги поврзува народите и културите.
До следната средба, Битола останува дом на детската уметност и град кој преку боите, цртежите и насмевките на младите творци испраќа порака за мир, пријателство и заедништво во светот.
