На 29.11.2025 година во 11:00 часот, во салата на Општина Новаци ќе се одржат јубилејните 25 Пелагонски културно-научни средби.
И годинава е предвидена богата културна програма, распоредена во неколку дела. После свеченото отворање, ќе следува промоција на Зборникот на трудови бр. 20 во кој се претставија авторите-учесници во минатата 2024 година. Веднаш по промоцијата, како и секоја година, ќе бидат доделени годишните награди кои традиционално ги доделува Здружението. Потоа следува работниот дел на кој годинешните автори-учесници ќе се претстават со своите нови трудови кои ќе бидат дел од Зборникот на трудови бр. 21 за 2025 година, а кој ќе се отпечати во наредната 2026 година.
Исто така, во склоп на настанот е предвидена и изложбена поставка на дел од Зборниците промовирани во претходните години, како и на дел од книгите во издаваштво на Пелагонските културно-научни средби.
Во изминативе 25 години Здружението Пелагониски културно-научни средби се покажаа како плоден расадник за развивање на научната, книжевната и уметничката мисла. Воедно, претставува здружение коешто ги поттикнува младите творци, од регионот, но и од цела Македонија, да творат и создаваат на македонски јазик. И иако се води како регионално здружение, со самото учество на автори надвор од границите на македонската држава, уште еднаш докажува дека науката и културата не познаваат граници.
Настанот е од отворен карактер за сите вљубеници во културата и науката коишто умеат да размислуваат и се подготвени да го облагородат сопствениот дух.
