Дури 6 од 10 вработени признаваат дека молчат на работното место, иако не се согласуваат со одлуките или ставовите на претпоставените. Најновото истражување покажува дека стравот од последици, губење на работното место и недостигот од доверба сè повеќе влијаат врз комуникацијата во компаниите.
Истражувањето, спроведено меѓу 600 вработени во САД, открива дека многумина избегнуваат искрено да го кажат своето мислење, дури и кога сметаат дека нешто не функционира добро. Повеќе од 61 проценти од испитаниците изјавиле дека често забележуваат колеги кои избираат да молчат наместо отворено да зборуваат.
Експертите предупредуваат дека во време кога многу компании кратат работни места и воведуваат нови технологии, вработените стануваат сè повнимателни во комуникацијата со менаџерите. Според тренерот за лидерство Ким Скот, луѓето често се плашат дека искреноста може да им наштети на кариерата.
Од друга страна, и самите менаџери признаваат дека имаат проблем со давање и примање критики. Над 70 проценти од раководителите во анкетата рекле дека никогаш немале вистинска обука како правилно да комуницираат со тимот или како да реагираат на негативен фидбек.
Истражувањето покажува и дека лошата комуникација може директно да влијае врз заминувањето на работниците. Вработените кои добиваат нејасни или неквалитетни повратни информации имаат многу поголеми шанси да дадат отказ во следните 12 месеци.
Посебна загриженост кај работниците предизвикува и развојот на вештачката интелигенција. Многумина стравуваат дека автоматизацијата ќе ги намали работните места, па поради тоа уште помалку се осмелуваат да укажат на проблемите во компанијата.
Експертите советуваат лидерите да создадат атмосфера во која вработените ќе се чувствуваат безбедно да го кажат своето мислење без страв од казна или осуда. Искрената комуникација, довербата и почитта се сметаат за клучни фактори за здрава работна средина.
